Movie
-
Part 3 響佛教嘅哲學同世界觀入面… 現存嘅物理世界通常被比喻為「生死海／苦海」，又稱之為「娑婆世界」（亦即Flow中文官方簡介入面所提及嘅「大千世界」，或者係「三千大千世界」）。 響呢個「大千世界」入面，任何現象（Phenomena）嘅本質（有機或無機）都係依賴「緣起（Dependent Origination）」而顯現（Manifest）。因此，基於呢個「因緣生，因緣滅」嘅特性，任何事物都屬無常（Impermanent），並無一個獨立存在嘅本質（Intrinsic Existence）。而呢一個「無本質嘅本質」，大概就簡略解釋咗佛教同心經入面經常提及嘅「空性（Emptiness Nature）」。 基於以上對世界嘅觀察同推論，早期佛教（Early Buddhism）將眾生（Sentient Beings）嘅存在拆解作「三相（Three marks of existence）」：由於任何現象（包括生命本身）嘅本質都係（1）無常（Impermanence），而對於無常嘅不可握則視為（2）苦（Suffering），因苦即是（3）無我（Not-self）。 而對於「苦」，佛教將「苦」視為一個生生滅滅不停重複嘅循環，即是平時會用嚟形容大家好suffer，每日「起身返工OT放工訓覺」同埋「又係Blue Monday」嘅「輪迴（Samsara）」。 不過，由於古時生為印度王子嘅佛陀唔使做社畜，佛教對「輪迴」嘅討論主要都係圍繞生死。而要超脫生死輪迴，達到稱為「涅槃（Nirvana）」嘅境界，佛教認為對於佛法聽（Hearing）、解（Thinking）、行（Practicing）係培養智慧唯一嘅「不二法門」（不二法門原為佛教成語，意指任何不落二邊極端嘅可行方法）。 噏完佛偈講翻Flow嘅世界… Flow嘅故事主軸由幾個重要元素組成，而當中以三個分別象徵「因、緣、果」嘅（1）洪水、（2）渡船，以及（3）石塔串連起整條時間線，以及故事發展嘅起承轉合同埋因果關係： （1） 洪水（因）洪水係整個貓喵的奇幻漂流故事嘅背景起因，亦代表住世界中小動物經歷嘅「苦」。主角喵作為一隻尋常地不善水性嘅貓，水代表住對於危機同生存嘅恐懼。而洪水嘅特如其來同埋（最後彩蛋嘅…）重複性，亦暗示住「苦」同輪迴本身無窮無盡地相繼循環嘅特性。 （2） 渡船（緣）當主角喵被迅速上漲嘅洪水迫上「貓山」，命沿一線走頭無路之際，貓與渡船巧合相遇嘅緣份為漂流故事展開序幕。渡船嘅出現就如聖經當中嘅挪亞方舟（Noah’s Ark）一樣難得，代表世界唯一能夠為渡過洪水苦難嘅工具。 而響佛教嘅經典當中，「船」或「船筏」亦象徵眾生能夠籍此渡過生死苦海嘅「佛法（Dharma）」。如《金剛經》入面佛陀講到「我所說法，如筏喻者，法尚應捨，何況非法。」，喻意佛法如同「船筏」，只係用於滅苦嘅工具，到達彼岸後亦應放下（就如蛇鷲最後棄船而去，下篇再井多少少…）。 （3） 石塔（果）最後故事中嘅石塔，係渡船嘅乘客中只有主角喵同蛇鷲知道，而又打算坐渡船到達嘅目的地（其他小動物只求生存，並無打算上岸）。石塔之高代表住遠離洪水嘅安定同埋心嘅解脫（留意主角喵嘅夢境…），等同佛教中代表渡過生死海後，能夠達到「涅槃（Nirvana）」嘅境界，或代表智慧（Wisdom，梵Prajñā）嘅彼岸…
-
Part 2: 上回講到，如果我地戴住佛教嘅「有『識（Mind）』眼鏡」去睇Flow，呢齣可愛憫人嘅貓喵漂流記，就會頓然被塗上滿滿嘅形而上哲學色彩。當然，對於Flow嘅中心思想，其實導演Gints Zilbalodis響不同訪問到有解釋。 Flow嘅故事原意本以主角喵天生對於水同埋狗仔嘅恐懼，去借喻人(包括作者自己)學識與恐懼／焦慮（Anxiety）共存同埋成長嘅過程。同時導演亦希望以洪水末日背景下，所發生嘅故事乃至Open Ending結局，去表達響人生同埋製作過程嘅困難之中，人與人之間互相合作同埋支持嘅重要性。 而呢個「人」對於「心」嘅學習同成長過程，以Camtrulia嚟講，亦同佛教嘅存在論（Onotology）同埋救贖論（Soteriology）不謀而合。 不過響進一步將Flow睇成一套Dharma movie，以（偽）詮釋學（Hermeneutics）去討論佛學上（1）以蛇鷲（Secretarybird）所影射嘅小乘佛法（Hinayana）、（2）鯨魚所借喻嘅大乘佛法（Mahayana），以及（3）不同小動物所代表嘅「心所（Mental Factors）」等等嘅概念之前，我地先研究一下Flow嘅故事背景，同佛教世界觀相似嘅地方…
-
Part 1: 話說前排睇咗《貓貓的奇幻漂流 Flow》，除咗感動嘅故事情節、優秀嘅動畫特技、同埋可愛嘅小動物之外，其中最發人心省同引發思考嘅，莫過於對於故事世界觀，以及當中想帶出咩訊息或者寓意嘅討論。 好多人覺得Flow刻意留白，並無特別為故事賦予任何概念上，或者價值觀上嘅假定。亦有影評認為，故事其實係描繪緊人嘅意識層。當中不同小動物嘅性格，分別代表緊佛洛伊德（Freud）精神分析模型入面嘅本我（id）、自我（ego）、超我 （superego）。 而以佛學角度黎講（咩都可以講下佛偈…），最有趣嘅相信係電影介紹入面提到故事嘅背景，係發生於人類滅絕之後嘅 Post-apocalyptic world (後末日世界)。而其後中文版簡介，就將其譯作「大千世界」，亦即佛教世界觀入面經常用黎形容（1）佛法衰落嘅「末法時代」（梵: sad-dharma-vipralopa）同埋（2）宇宙嘅無限大以及複雜性嘅「三千大千世界」。 如果我地用返以上官方(?)嘅佛教世界觀去睇Flow，呢套貓喵歷險記就頓時變成另一套同《Matrix》一樣Deep過Johnny Depp嘅「Dharma movie」。 當然，電影嘅世界同文學一樣，好多時觀眾睇到嘅只係一塊螢幕上嘅Blue Curtain… －－－－－以下劇透－－－－－ 話雖如此，當到Flow臨近結局一開始見到「蛇鷲升天」超自然嘅呢幕，可能一方面覺得畫面華麗感動，但另一方面又難免覺得有少少兀突，或者格格不入。但再諗深一層，以上面嘅討論去拓展，就會發覺故事同佛教世界觀相應同埋契合嘅地方…